मराठी चित्रपटांची मॉरिशसवर स्वारी
मुंबई, ता. १८ - चौकटीबाहेर पडू पाहणाऱ्या मराठी चित्रपटांनी आंतरराष्ट्रीय भरारी घेतली असून पहिला आंतरराष्ट्रीय मराठी चित्रपट महोत्सव यंदा राज्य सरकारने मॉरिशस येथे आयोजित केला आहे. या महोत्सवासाठी मॉरिशस सरकारचे विशेष सहकार्य मिळणार आहे.
२५ जुलैपासून मॉरिशसमध्ये सुरू होणाऱ्या या पाच दिवसांच्या महोत्सवात गेल्या तीन वर्षांतील पारितोषिकप्राप्त चित्रपट दाखविण्यात येणार आहेत. डोंबिवली फास्ट, काय द्याचं बोला, खबरदार, नितळ, रेस्टॉरन्ट, सावली, टिंग्या, चेकमेट, एवढंसं आभाळ, शेवरी; तसेच सरकारी अनुदानित सेनानी साने गुरुजी आणि वासुदेव बळवंत फडके हे ऐतिहासिक व्यक्तींवरील गाजलेले चित्रपट दाखविले जाणार आहेत. मराठी चित्रपटांचा मागोवा घेणारे चर्चासत्र, मराठी चित्रपटांसाठी आंतरराष्ट्रीय बाजारपेठ, महाराष्ट्राचे सांस्कृतिक जीवन यावर व्याख्याने होणार आहेत.
या महोत्सावात मंगेश हाडवळे, संजय जाधव, अंकुश चौधरी, बिपिन नाडकर्णी, अशोक शिंदे, सुमित्रा भावे, रिमा लागू, संदीप कुलकर्णी, चंद्रकांत कुलकर्णी, महेश कोठारे, अजिंक्य देव, किशोर कदम, नीना कुलकर्णी, अजय सरपोतदार सहभागी होणार आहेत.
Subscribe to:
Post Comments (Atom)
No comments:
Post a Comment